Te Kura Tuarua o Taumarunui

Kōrero o Mua

'Ehara taku toa i te toa takitahi, engari he toa takitini'

I te tau 2008 ka whakatau te tumuaki hou ki te whakaheke i te mahi kai paipa i roto i tēnei kura tuarua. Kātahi ka whakatūria a Chris Patten te kaihautū o te whakaakoranga whakakori hei Kaiwhakahaere Auahi Kore.

Mai i taua wā ki nāianei he nui te mahi whakatairanga i roto i te kura me te hapori. Ko te whāinga o te kaupapa he tautoko i ngā ākonga me ngā kaimahi.

Te Whakamahere

Nō muri i te hui tuatahi ka pātaihia te Health Sponsorship Council e Chris mō te huarahi hei whai māna. Ka rangahau hoki ia i tēnei paetukutuku. Nā reira ka puta tana tuhinga e whakarārangi ana i ngā whāinga mō te tau tuatahi. Ka whakamahia e ia te papatauira kaupapahere o tēnei paetukutuku.

Nā te pūtea tautoko a Waikato Primary Health, ka hokona e te kura he rauemi pērā i ētehi ataata, pukapuka hoki hei tāpiri atu ki ngā rauemi mō te marautanga hauora. Ka whakatūria e te kura he tahua auahi kore e $500 te rahinga hei utu i te whakatinanatanga o te kaupapahere. Koinei te wā tuatahi kua whakaritea tahua pēnei.

Te Whakatinanatanga

Nā te tumuaki tuarua te kaupapahere i āwhina ki te whakarewa. Kua 35 ngā tau ia e kai paipa ana. Ka tū ia hei māngai mō te kura me te kī, ka mutu ia ā te rā kua tohua e ia. Ka whakapā atu te kura ki te nuipepa ā-rohe, ā, ka puta tētehi kōrero māna, me tōna whakaahua ki mua i tētehi o ngā tohu auahi kore ā-kura e 20.

Whai muri i tērā ka tīmata te whakatinana i te mahere whakatairanga whānui. Ka whakairihia ngā whakaahua me ngā haki auahi kore ki ngā akomanga katoa me te hōro. Ka whakapiria ngā whakapiri ki ngā papapānui, ā, ka waituhia ngā ara hīkoi ki ngā papatauira o ngā tohu.

Ka utua e te kura te $25 tāra mō ia tohu rino, engari ka takohangia e te Health Sponsorship Council te nuinga o ngā rauemi, arā, he tī hāte, he poraka, he pōtae, he pātara inu, he pene, he pēke, he ngaungau, he poihau, he whakapiri hoki.

Ka whakaauahi korengia ngā whakataetae oma, whakataetae kauhoe, me ērā mea katoa e Te Kura Tuarua o Taumarunui. Ka tū hoki tētehi whakaaturanga kākahu toi e whakatairanga ana i te kōrero auahi kore. Ka mau i ngā pouako akoranga whakakori ngā kākahu auahi kore i a rātou e whakaako ana. Kei ngā pānui ā-kura ngā tuhituhinga e whakamōhio ai te whānau whānui ki te kaupapahere. Ka tonoa hoki ngā mātua ki te āwhina i ngā ākonga ki te whakamutu.

Kei te whakatū te kura i tētehi ohu kaimahi hei whakatau i ngā ākonga kaipaipa. Kei te whai huarahi kē rātou atu i te whiunga noa iho. E ngana ana rātou ki te whai huarahi hei tautoko i ngā ākonga, engari ko tā Chris, nā te tokoiti o ngā tāngata hei āwhina, hei whai wā hoki ki ngā ākonga, he uaua te whakatinanatanga.

Arotakenga

He nui ngā hua ka puta ki te taha whakatairanga. Kei te ora tonu te kaupapahere. Ka ngana te tokorua o ngā kaimahi ā-kura ki te whakamutu.

Ngā Painga

He tino pai te rā whakarewa o te kaupapahere. Ka tū te tumuaki tuarua hei tauira pai mō ngā ākonga. I reira hoki te hunga pāpāho māna te kaupapa e whakamōhio atu ki te whānau whānui. He tino pai ki ngā ākonga ngā waituhi i runga i ngā ara hīkoi.

Ngā Āhuatanga Hei Whakakaha Ake

Kei te ngana te kura ki te whakatau i ngā take pērā i te whai wā ki te kaupapa, te whai tāngata hoki hei āwhina, kia taea ai ngā ākonga kaipaipa te tautoko pai. Kei te whai huarahi tonu rātou ki te whakatau i ēnei take. Tēnā pea ka pātaihia te whānau whānui ki te āwhina.

Kei te whakapono a Chris ka taea te kaupapa te whakakaha ake ki tō rātou kura. Heoi anō, ki ōna whakaaro ahakoa he iti, he taonga katoa ngā pikinga o tēnā taumata, o tēnā taumata kia tutuki pai ai te whāinga o te kura auahi kore.

Ko tāna "He āhua pōturi te haere. Māku e kī atu, whāia ngā huarahi katoa e taea ai hei whakatairanga i ngā take. Kāore e taea mā te huarahi kotahi."