Te Kura Tuarua o Queen Charlotte

Kōrero o Mua

'Ka mau te wehi!'

I tētehi rā whakanui hauora ka whai mōhio ngā ākonga tau 13 o tēnei kura nō Waikawa he auahi kore katoa rātou (e 23 ngā ākonga). Ka puta te whakaaro kia whakamōhiotia te iwi whānui.

I te tau 2008 ka whakatau a Amy Jansen he mema o te komiti hauora ā-kura ki te whakanui i tēnei take. Ka whakatūria e ngā ākonga tētehi rōpū auahi kore hei wāhanga o te komiti hauora. Ka hangaia e rātou tētehi pānui whakaahua mai i tā rātou whakaahua ā-kura o ngā ākonga tau 13.

Te Whakamahere

I te tīmatanga ka whakapā atu a Amy ki te kamupene nā rātou te whakaahua i tango. Mīharo katoa rātou ki tōna whakaaro nui. Ka hoaturia te whakaahua tūturu ā-hiko mō te utu kore.

Kātahi ka whakamahia e ngā ākonga te Photoshop hei tāpriri whakairoiro. Nā ō rātou hoa me te pouako rorohiko rātou i āwhina.

I hanga rātou i ngā pānui whakaahua i te kura i te mea he māmā te utu. E 30 heneti te utu hei whakapaparanga (laminate) hei tā hoki. Nā te tahua a te kaunihera ākonga te utu i ea.

Te Whakatinanatanga

I tohatoha ngā pānui whakaahua huri noa i Te Kura Tuarua o Queen Charlotte, ki kura tuarua kē, ki te whare waka kōpiko (ferry) me ngā toa ā-rohe. Nā te whakapānga atu a te tumuaki me te tumuaki tuarua ki te whare nuipepa ā-rohe i āwhina te whakatairanga o te kaupapa.

Arotakenga

Ngā Painga

He tino pai te kaupapa nei ki ākonga kē. Ka kī atu ētehi he kino te mahi kai paipa ki a rātou. Ki tā Amy nā te pānui whakaahua rātou i tū māia ai ki te kōrero mō tēnei take.

Tēnā pea ka taea e te kaupapa whakaaro o te pānui whakaahua te whakahāngai atu ki kura kē, hei tauira pai mō ō rātou ākonga.

Nā ngā painga i tautoko ai te whakaaro mēnā ka pūmau ngā ākonga tuākana ki te kaupapa kāore e kore ka whāia te tauira pai e ngā ākonga tēina.

Ko tā Amy: "Ohorere katoa te iwi whānui nā runga i te mōhio he auahi kore katoa ngā ākonga tau 13. He tino pai kia whakahoki mai te whakapono mō te hunga taiohi."

Ngā Āhuatanga Hei Whakakaha Ake

Māhorahora ana te kaupapa whakaaro nei. Tēnā pea he pai ake kia āta whakamahere. He poto te wā ki ngā ākonga ki te whakaputa i te pānui whakaahua i te mea kāore kau ngā whakaritenga i te tīmatanga. I whakaputaina te pānui whakaahua i te mutunga o te tau, nō reira kāore rātou i whai wā kia whānui ake tana whakaratonga, ā, kia whānui ake hoki te whakatairanga e te hunga pāpāho.